«Саас» - Саина Рожина тус быыстапката

10.04.2021

Быйыл В.С.Яковлев – Далан аатынан Кытаанах орто оскуолата художественнай-эстетическэй хайысханы талан үлэлээбитэ 30 сылын бэлиэтиир. Үбүлүөйдээх сылга ананан ыытыллар тэрээһиннэр чэрчилэринэн муус устар 10 күнүгэр Кытаанахтааҕы «Түһүлгэ» норуот айымньытын дьиэтигэр   оскуолабыт 11 кылааһын үөрэнээччитэ, улуустааҕы “Үөрүү” оҕону сайыннарар киин иитиллээччитэ Саина Рожина тус быыстапката арылынна. Бэлиэтээн эттэххэ, уруһуйунан айымньылаахтык дьарыктанар оҕо тус быыстапкалатын тэрийиитэ биһиги оскуолабыт үтүө үгэһэ буолар, ол курдук маннык быыстапкалары тэрийбиттэрэ: 2004 с. Попова М., 2005 с. Игнатьева К., 2009 с. Захаров А., 2011 с. Кривошапкина М.,  2014 с. Бахчанен И., Бурнашева Л.,  2016 с. Попов В.. Пандемия мэһэйдээн былырыын Егорова И., Шишигина К. быыстапкалара кэтэхтэн ыытыллыбыта.

               Саина 2003 сыллаахха Чурапчы улууһун Чурапчы нэһилиэгэр  Рожин Эдуард Васильевич уонна Ольга Ивановна үс оҕолоох дьиэ кэргэннэригэр, иккис оҕонон төрөөбүтэ. Саина кыра эрдэҕиттэн уруһуйдуурун сөбүлүүр, ол иһин 2010-2015 сылларга Чурапчы музыкальнай оскуолатын художественнай оскуолатын, Захарова Катерина Константиновна кылааһыгар ситиһиилээхтик үөрэммитэ, 2016 сыллаахтан Кытаанахха В.С.Яковлев-Далан аатынан уопсай үөрэхтээһин оскуолатын уруһуй хайысхатыгар Миронова Евдокия Тимофеевна салалтатынан үөрэнэр.

               Саина уруһуй оскуолатын үөрэтэр программаны ситиһэн, үөрэҕин таһынан «Эдэр художник» студияҕа дьарыктанан, иллэҥ кэмигэр айымньылаахтык үлэлиир. Художественнай оскуола үөрэнээччитэ буоларынан, үлэлэрэ сүрүннээн харандааһынан, акварель, гуашь кырааскаларынан уруһуйдаммыт натюрморт, тиэмэлээх композициялар буолаллар. Быыстапкаҕа барыта түөрт уонтан тахса араас тиэмэҕэ уруһуйдар, эдэр жудожник айар альбомнара, саҥа бэчээттэнэн тахсыбыт альбом-кинигэтэ ууруллан дьон сэҥээриитин ыллылар.

               Эдэр худуоһунньук  айымньылаах үлэтин биир өрүтүнэн  кини араас таһымнаах күрэхтэргэ ситиһиилээхтик кыттыыта буолар.  Ол курдук: Саина 2018 с. ЯАССР үтүөлээх диэйэтэлэ А.П.Собакин  90-сааһыгар анаммыт Бүтүн Россиятааҕы «Красота природы Якутии»  уруһуй күрэҕэр 1 миэстэни ылбыта, 2019 с.  республикатааҕы   «Северная палитра»,  «Твой успех» уруһуй күрэхтэрин кыайыылааҕынан тахсыбыта. 2020 с. Дьоруой  Ф.М.Охлопков аатынан республикатааҕы, «Слава России»  Бүтүн Россиятааҕы кэтэхтэн уруһуй күрэхтэрин  кыайыылааҕа буолбута. 2021 с. республикатааҕы   «Күндү ийэм - күн тэҥэ киһим» күрэххэ  1 миэстэни, республикатааҕы   И.Е Винокуров аатынан «Норуокка анаммыт олох» уруһуй күрэҕэр 2  миэстэни ылбыта.  Саина - Республикатааҕы  «Родные пейзажи» уруһуй күрэҕэр – Гран при хаһаайката, «Моя природа» бүтүн Россиятааҕы кэтэхтэн уруһуй күрэҕин кыайыылааҕа.

               Маны таһынан Саина былырыын Регионнааҕы  “Макаров ааҕыыларыгар” Арыылаах нэһилиэгин олохтооҕо, поэтесса Анна Дмитриевна  Барашкова –Айылҕаана хоһооннорунан айылҕаны уруһуйдаан, НПК кыттыбыта. Ол айымньылаах бырайыактарын салҕаан, быйыл, муус устар ыйга, оҕолорго анаан  «Сахам сирэ, кэрэҕин!» альбом - кинигэни бэчээттэтэн таһааран үөрүүбүт үксээтэ.

               Быйылгы «Саас» быыстапка,  нэһилиэккэ норуот айымньытын дьиэтигэр сценаҕа монитор туруоруллан, быыстапканы сонуннук байытан көрдөрүүгэ кыаҕы биэрдэ.  Түгэнинэн туһанан, үөрэнээччибит Рожина Саина тус быыстапкатын үрдүк таһымҥа тэрийсибит Саина ийэтигэр, оскуолабыт выпускнигар  Ольга Ивановнаҕа, «Түһүлгэ» норуот айымньытын дьиэтин коллективыгар   (салайааччы СӨ култууратын туйгуна Монгуш Л.Н.) махталбын тиэрдэбин.        Маннык кэрэ түгэни бэлэхтээбит иитиллээччибэр Саинаҕа  инники олоҕор ситиһиилэри, айымньылаах аартыга кэҥээн иһэригэр баҕарабын.

В.С.Яковлев – Далан аатынан Кытаанах

уопсай үөрэхтээһин оскуолатын уруһуйга учуутала,Хочу такой сайт

«Эдэр худуоһунньук»  студия салайааччыта

 РФ уопсай үөрэхтээһинин бочуоттаах үлэһитэ,  Е.Т. Миронова.  

Килэҥки,  2021 сыл, муус устар ыйа.

Просмотров всего: , сегодня:

Рейтинг: . Оценили: .

Дата создания: 14.04.2021

Дата обновления: 14.04.2021

Дата публикации: 10.04.2021

Наверх
На сайте используются файлы cookie. Продолжая использование сайта, вы соглашаетесь на обработку своих персональных данных. Подробности об обработке ваших данных — в политике конфиденциальности.

Функционал «Мастер заполнения» недоступен с мобильных устройств.
Пожалуйста, воспользуйтесь персональным компьютером для редактирования информации в «Мастере заполнения».